അവൾ

മണ്ണിന്റെ മാറിലേക്ക്

അവൾ പെയ്തിറങ്ങി

കാർമേഘ കൂടുകളിൽ

സൂര്യൻ പിടിച്ചു വെച്ച പെണ്ണ്

ആർത്തി പൂണ്ട മണ്ണ്

മാടി വിളിച്ചപ്പോൾ

കൂടു പൊളിച്ച് അവളെത്തി

മണ്ണിന്റെ പൈദാഹമാറ്റാൻ

മേഘങ്ങൾ ഗർജിച്ചു

അവരുടെ കോപാവേശം

കണ്ണുകളിൽ അഗ്നിയായി ജ്വലിച്ചു

മഴ ആനന്ദനൃത്തമാടി

കാറ്റും അവളോടൊപ്പം കൂടി

ഗിരിശൃംഗങ്ങൾ ആടിയുലഞ്ഞു

മരങ്ങൾ കടപുഴകി

മണ്ണിൻറെ മനം കുളിർത്തു

മാറ് നിറഞ്ഞു 

മഴ നിർത്താൻ ഭാവമില്ല

നൃത്തം താണ്ഡവമായി 

മണ്ണിൻറെ മക്കൾ വാവിട്ടു

ആനന്ദത്തിൽ മുഴുകിയ 

സൂര്യന്റെ മനസ്സലിഞ്ഞു

തൻറെ പ്രണയിനിയെ 

ചേർത്തുപിടിച്ചു 

ആ കരവലയത്തിൽ

അവൾ തെല്ലൊന്ന് 

ശാന്തയായി

-പ്രശാന്ത് കണ്ണോം-

പെരുന്നാൾ ആശംസകൾ

ആർദ്രമായ മനസ്സിന്റ നൈർമല്യവും ആനന്ദവും സാഹോദര്യ സ്നേഹവും ഒന്നിച്ച് ദാനധർമ്മാദികളാലും സേവന കർമങ്ങളാലും അകലത്തിരുന്നാണേലും മനസ്സു കൊണ്ട് ഒന്നിച്ചുള്ള നമ്മുടെ പെരുന്നാൾ ദിനം പുണ്യം നിറഞ്ഞതാവട്ടെ.പെരുന്നാൾ  ആശംസകൾ 

-ജ്യോതിഷരത്നം പ്രശാന്ത് കണ്ണോം-

പ്രണാമം

അന്തരംഗം വിതുമ്പുന്നു

അക്ഷരങ്ങൾ വിറകൊള്ളുന്നു

അഭ്രപാളികളിൽ മറഞ്ഞൊരീ

അറിവിന്റെ ഗുരുനാഥനായ്

അകലെ ആകാശപഥങ്ങളിൽ

അനന്തശയന പാദങ്ങളിൽ

അണയാ ജ്യോതിയായ് നീ

അമരനായ് മരുവൂയിനി

-പ്രശാന്ത് കണ്ണോം-

അമ്മ

നന്മ ചെയ്യുന്ന മർത്യന്നു മണ്ണിതിൽ

കർമ്മദോഷം വരികില്ല നിർണ്ണയം

തിന്മ തീണ്ടാതെ മണ്ണിതിൽ വാഴുവാൻ

അമ്മ തന്നെ തുണ പാരിലാർക്കുമേ

-പ്രശാന്ത് കണ്ണോം-

പനിനീർ

മരതക പട്ടണിഞ്ഞീറനോടെ

മേനിയിൽ മാദകപ്പൂവു ചൂടി

മാനത്തെ കാന്തനേക്കാത്തിരിക്കും

മോഹിനീ സുന്ദരീയെൻ പനിനീർ

-പ്രശാന്ത് കണ്ണോം-

ഒരു വിത്തു പാകണം മണ്ണിൽ നമ്മൾ

ഒരു വിത്തു ഹൃത്തിലും സൂക്ഷിക്കണം

ഒരുമിച്ചു കൂടണം സ്നേഹം പകരണം

ഒരു പുതുവർഷത്തെ നെഞ്ചിലേറ്റാൻ

-പ്രശാന്ത് കണ്ണോം-