ഉ-ഉറി(സ്വരാക്ഷരപ്പാട്ട് )

ഉറിയൊന്നുണ്ടേ തൂങ്ങുന്നേ
ഉറിയിൽ വെണ്ണയിരിപ്പുണ്ടേ
ഉണ്ണിക്കുട്ടൻ കൊതിയോടെ
ഉറിയും നോക്കിയിരിപ്പാണേ
പ്രശാന്ത് കണ്ണോം

ഈ-ഈച്ച(സ്വരാക്ഷരപ്പാട്ട് )

ഈച്ച വരുന്നുണ്ടേ തേനീച്ച
ഈണത്തിൽ മൂളി വരുന്നുണ്ടേ
ഈമരക്കൊമ്പിലേ കൂട്ടിനുള്ളിൽ
ഈച്ചയ്ക്ക് കൂട്ടായി റാണിയുണ്ടേ

പ്രശാന്ത് കണ്ണോം

ഇ-ഇല(സ്വരാക്ഷരപ്പാട്ട് )

ഇലയിൽ മുമ്പൻ വാഴയില
ഇലയൂണമ്പോ ബഹുകേമം
ഇലയടയാണേൽ രുചിയേറും
ഇലയതുവേണേൽ കുട ചൂടാം

പ്രശാന്ത് കണ്ണോം

ആ-ആന(സ്വരാക്ഷരപ്പാട്ട് )

ആന അനങ്ങി വരണ കണ്ടോ
ആറാട്ടു കൂടാൻ വരണ കണ്ടോ
ആരും കൊതിക്കണ ചേലു കണ്ടോ
ആളുകൾ പിമ്പേ പോണ കണ്ടോ

പ്രശാന്ത് കണ്ണോം

അ-അമ്മ(സ്വരാക്ഷരപ്പാട്ട് )

അമ്മയെന്നുമെന്റെ സ്വന്തമായിരുന്നു
അമ്മ ചൊന്നതെല്ലാം നന്മയായിരുന്നു
അമ്മതന്നെയെന്നും നാം പിറന്ന നാടും
അമ്മയെ നമിക്കാം നന്മതേടി നീങ്ങാം

പ്രശാന്ത് കണ്ണോം

കേരളപ്പെണ്ണ്

ചിഞ്ചിലം പാടിയൊഴുകും പുഴ
ചില്ലകൾ താഴ്ത്തിയ കണ്ടലുകൾ
ചിത്തിരത്തോണികളേറെയുണ്ടേ
ചിത്തത്തിലാനന്ദമേകീടുന്നേ
കേരങ്ങൾ തിങ്ങിയ തീരങ്ങളും
കേകികളാടുന്ന പൂന്തൊടികൾ
കേളികൊട്ടെങ്ങും മുഴങ്ങീടുന്നേ
കേരളപ്പെണ്ണിനിതെന്തുഭംഗി

പ്രശാന്ത് കണ്ണോം 

തത്തമ്മേ

മാമരമൊന്നിൽ തത്തി നടന്ന്
മാന്തളിർ തിന്നും തത്തമ്മേ
മാവിൻ ചോട്ടിൽ നില്ക്കുമെനിക്ക്
മാമ്പൂ തരുമോ തത്തമ്മേ
പ്രശാന്ത് കണ്ണോം

നമിക്കാം

മണിനാദവും ചെണ്ടവാദ്യവും മുഴങ്ങുന്ന
പ്രഭാത പൂജാവേള..കിഴക്കിന്റെ അരുണകിരണങ്ങൾ മാടായി തിരുവർക്കാട്ടമ്മയുടെ തൃച്ചേവടികളെ വന്ദിക്കുന്ന പുലർവേള.
തിരവോണദിനത്തിലെ അമ്മയുടെ ദർശന സായൂജ്യം.പ്രകൃതി...ശക്തി...മഹാപ്രളയസാക്ഷിണി...തിരുനടയിൽ ശിരസ്സു നമിച്ചപ്പോൾ
ഒരു വിദ്യുത് സ്പുലിംഗം തരംഗരൂപിയായ് കടന്നു പോയ്...ജന്മാന്തര പാപബന്ധങ്ങളുടെമുക്തി...നമിക്കാം ദുരിത നിവാരണത്തിനായ് പ്രാർത്ഥിക്കാം

പൊന്നോണം

അത്തത്തിനൊത്തിരി പൂ പറിച്ച്
ചിത്തിരപ്പെണ്ണ് ഒരുങ്ങി വന്നേ
ചോതിയോ മുറ്റത്ത് പൂക്കളിട്ടു
വിശാഖമൊ പൊന്നരിച്ചോറുവച്ചു
അനിഴം കറികൾ പലതൊരുക്കി
തൃക്കേട്ട പായസം രണ്ടു വച്ചു
മൂലമോ വാഴയില മുറിച്ചു
പൂരാടം താളത്തിൽ പാട്ടു പാടി
ഉത്രാടം മേളമൊരുക്കി നന്നായ്
തിരുവോണത്തപ്പനേ കാത്തിരുന്നു
പ്രശാന്ത് കണ്ണോം

ഉത്രാടത്തലേന്ന്

''അയ്യോ അവളെവിടെ...തന്റെ കണ്ണായവൾ
അവളില്ലെംകിൽ താനില്ല കഴിഞ്ഞ വർഷം ആലപ്പുഴയിൽ നിന്നും കൂടെ പോന്നതാ.
തന്റെ ഓരോ പ്രവർത്തിക്കും കൂട്ടിരുന്നവൾ.
എഴുത്തും വായനയും ഓഫീസിലെ സിസ്റ്റം പ്രോഗ്രാമുകളും എല്ലാം അവളില്ലാതെ ചെയ്യാനാകില്ല...ഉറങ്ങുമ്പോൾ മാത്രമാണ് അവളെന്നെ പിരിയാറുള്ളത്...പക്ഷെ അവളെ എനിക്ക് നഷ്ടമായിരിക്കുന്നു''
അയാൾ ആ സത്യവുമായി പൊരുത്തപ്പെടാൻപാടുപെട്ടു.

അയാൾ വൈകുന്നേരം പതിവിലും നേരത്തേ റെയിൽവേ സ്റ്റഷനിൽ വന്നിറങ്ങിതായിരുന്നു.ഉത്രാടത്തിനും ഒാണത്തിനുംഅവധി.അടുത്ത ദിവസം ഞായറാഴ്ചയും.മൂന്നു ദിവസം അവധി.ഇക്കുറി പ്രളയം കാരണം ആഘോഷങ്ങളില്ല.ദുരിത ബാധിതർക്കായി എന്തെംകിലും ചെയ്യണം.ചിന്തകൾ പലവഴിക്കും പോയി.

മഴ ചാറാൻ തുടങ്ങി.കോട്ടും ഹെൽമ്മറ്റും ധരിച്ചു.അവളെ മഴച്ചാറലേൽക്കാതിരിക്കാൻ
സ്കൂട്ടറിന്റെ മുന്നിലെ ഹോൾഡറിലിരുത്തിയിരുന്നു.അവിടെ അവൾ സേഫായിരുന്നു.
ആകെ സ്കൂട്ടർ നിർത്തിയിട്ടത് പച്ചക്കറിക്കടക്കു മുന്നിലാണ്.
സാധനങ്ങൾ വാങ്ങി തിരിച്ചു വന്നപ്പോഴേക്കും അവളില്ല...

''ആരാണ് അവളെ കിഡ്നാപ്പു ചെയ്തത്.
എന്തിനാണീ ക്രൂരത..? അല്ല അവൾ ചാടിപ്പോയതാണോ...''വന്ന വഴിയേ റെയിൽവേ സ്റ്റേഷൻ വരെ അയാൾ അവളെ തിരഞ്ഞു നടന്നു.അയാളുടെ നെഞ്ചകം നീറി.
അയാൾകരഞ്ഞു. അവളെ കണ്ടെത്താൻ അയാൾക്കയില്ല.തന്റെ കണ്ണിൻ വെളിച്ച മാണ് നഷ്ടപ്പെട്ടത്.തന്റെ കാഴ്ച...താൻ ഏറെ ഇഷ്ടപ്പെട്ട ലണ്ടൻ ഹോർസ് എസ് പി 'കണ്ണട'

തിരുവോണം

തിരുവോണത്തിൻ തിരുമുറ്റത്ത്
തിരുവാതിരയും പൂക്കളവും
തിരുവോണത്തിൻ കോടിയണിഞ്ഞ്
തിരുനാമങ്ങൾ പാടുന്നേ
പ്രശാന്ത് കണ്ണോം

ഉത്രാടം

ഉത്രാടപ്പൊൻ വെയിലെത്തിനോക്കി
ഉമ്മറമുറ്റത്തെ  പൂക്കളത്തേ
ഉത്രാട സദ്യയൊരുങ്ങിയല്ലോ
ഉൽസാഹമായല്ലോ കുട്ടികൾക്കും
പ്രശാന്ത് കണ്ണോം

പൂരാടം

പൂരാടത്തിന് പൂന്തേനുണ്ണാൻ
പൂവുകൾ തേടും പൂമ്പാറ്റേ
പൂത്തുവിരിഞ്ഞൊരു പൂമരമുണ്ടേ
പൂന്തേൻ തരികിൽ പറയാം ഞാൻ
പ്രശാന്ത് കണ്ണോം

മൂലം

മൂലമോ മാനത്തുദിച്ചു നിന്നേ
മൂന്നുലോകങ്ങളും ദീപ്തമാക്കാൻ മൂവന്തിനേരമായ് മാലോകരീ
മൂവർണ്ണകാന്തിയിൽ മുങ്ങീടുന്നേ
പ്രശാന്ത് കണ്ണോം

തൃക്കേട്ട

തൃക്കേട്ട നാളെത്തി കൂട്ടുകാരേ
തൃക്കരങ്ങൾ കൊട്ടി ആടിടേണ്ടേ
തൃക്കണ്ണനീശനെ വാഴ്ത്തിടേണ്ടേ
തൃച്ചേവടികൾ നമിച്ചിടേണ്ടേ
പ്രശാന്ത് കണ്ണോം

അനിഴം

അനിഴമലയിലായ് പൂത്തു നിൽക്കും
അരിമുല്ല കാറ്റിനോടോതിയല്ലോ
അരുതേ നീ ശാന്തത കൈവിടല്ലേ
അരുമക്കിടാങ്ങളേ കാത്തിടേണം
പ്രശാന്ത് കണ്ണോം

വിശാഖം

വിണ്ണിലുദിച്ചു വിശാഖ താരം
വിശ്വത്തിനാനന്ദമേകിടാനായ്
വിനയം വെടിയാതെ മുന്നേറണം
വിജയങ്ങളൊന്നായി നേടീടണം
പ്രശാന്ത് കണ്ണോം

ചോതി

ചോതിപ്പറവകൾ പാറി വന്നേ
ചോലക്കരയിലെ പൂ പറിക്കാൻ
ചോദ്യങ്ങളൊന്നുമേ ചൊല്ലിടാതെ
ചോറും കറികളും നൽകിടും ഞാൻ
പ്രശാന്ത് കണ്ണോം

ചിത്തിര

ചിത്തിര ചന്തത്തിലെത്തിയല്ലോ
ചിത്തം നിറക്കുവാൻ മോദമേകാൻ
ചിഞ്ചിലം താളത്തിൽ നൃത്തമാടി.
ചിത്രശലഭങ്ങൾ കൂട്ടിനുണ്ടേ
പ്രശാന്ത് കണ്ണോം

അത്തം തൊട്ടോണം

അത്തം പൂവിളി കൂട്ടുന്നേ
ചിത്തിര ചമയമൊരുക്കുന്നേ
ചോതിപ്പറവകൾ കൂവുന്നേ
വിശാഖം കോടിയുടുക്കുന്നേ
അനിഴം സദ്യയൊരുക്കുന്നേ
തൃക്കേട്ട ദീപം കൊളുത്തുന്നേ
മൂലം മുറ്റമൊരുക്കുന്നേ
പൂരാടം പൂക്കളം തീർക്കുന്നേ
ഉത്രാടം ആർപ്പു വിളിക്കുന്നേ
തിരുവോണം വന്നേ കൂട്ടുകാരെ

സ്വാതന്ത്ര്യ നാൾ

പാറും പറവകൾ വാനിലൂടെ
പായും മൃഗങ്ങൾ വനത്തിലൂടെ
പാരിടമെങ്ങുമേ ജീവജാലം
പാരതന്ത്ര്യത്തെ ഭയപ്പെടുന്നു
സ്വാതന്ത്ര്യ ബോധം വളർത്തിടേണം
സ്വാതന്ത്ര്യമെന്നും കാത്തിടേണം
സ്വാതന്ത്ര്യനാളിൻ സ്മരണവേണം
സ്വാതന്ത്ര്യമെന്നുമമൃതമാണേ
പ്രശാന്ത്  കണ്ണോം

പൊൻ സുദിനം

സ്വാതന്ത്ര്യ ദിനാശംസകൾ

ബാലഭൂമി 10.08.2018

കുട്ടനും തുമ്പീം

ഓണത്തുമ്പീ ഓമനത്തുമ്പീ
ഓണത്തിനിത്തിരി പൂ തരുമോ
ഓമനക്കുട്ടാ ഓടി വാ കുട്ടാ
ഓണത്തിനൊരുവട്ടി പൂ തരാലോ

പ്രശാന്ത് കണ്ണോം 

താളത്തിൽ

താളത്തിൽ പെയ്യുന്നേ ചാറ്റൽമഴ
താളത്തിൽ ആടുന്നേ പൊൻമയിലും
താളത്തിൽ തുള്ളുന്നേ മാക്രികളും
താളത്തിൽ പാടുന്നേ കുട്ടികളും

പ്രശാന്ത് കണ്ണോം 

കാക്കേം കുട്ടീം

കുട്ടീ കരയുവതെന്താണ്
കൂടേ നീയുംപോരുന്നോ
കാക്കേ  കൂടെ പാറീടാൻ
കുട്ടിച്ചിറകുകളില്ലല്ലോ!!

പ്രശാന്ത് കണ്ണോം

കാറ്(കുട്ടിക്കവിത)

കർക്കിടകത്തിൻ കറുത്ത കാറ്
കണ്ടില്ലേ മാനത്തൂടോടുന്നത്
കാറ്റിനാലോടുന്ന കാറുകൾക്ക്
കണ്ടില്ലേ ബ്രേക്കില്ല ചക്രമില്ല

പ്രശാന്ത് കണ്ണോം

പെരുമഴ

മഴ മഴ പെരുമഴ  പെയ്യുന്നേ
മഴയാൽ പുഴകൾ നിറയുന്നേ
പുഴ വഴിമാറീട്ടൊഴുകുന്നേ
പലവഴിയാളുകളോടുന്നേ

പ്രശാന്ത് കണ്ണോം 

എന്റെ കേരളം

Welcome ...
prasanthkannom.blogspot.com
ഇന്ന് കേരളപ്പിറവി ദിനം
ആശംസകളോടെ ...

എന്റെ കേരളം
-----------------------
കേരമരങ്ങള്‍ കുണുങ്ങിയാടും
കേരളപ്പെണ്ണിനിന്നെന്തു ചേല്
കേകികള്‍ നര്‍ത്തനമാടിടുന്ന
കേദാരമാം  മമ കേരളമേ

കുഞ്ചന്റെ തുള്ളല്‍ കഥകളിയും
കൂടിയാട്ടോം കൂത്തും കോലങ്ങളും
കുരവയിട്ടാര്‍പ്പു വിളികളുണ്ടേ
കൂട്ടരേ കേരളം പുണ്യനാട്

കേരള മണ്ണിന്റെ പൈതൃകത്തെ
കേവലം വാക്കിലൊതുക്കരുതേ
കേരളപ്പെണ്ണിനേ കാത്തിടേണം
കേളികളെങ്ങും പരത്തിടേണം